(កណ្ដាល)៖ គឹម ស្រូយ ភេទស្រី កើតក្នុងឆ្នាំ១៩៤៥ បច្ចុប្បន្នមានអាយុ ៧៧ឆ្នាំ។ ស្រូយ មានស្រុកកំណើតនៅឃុំរកាខ្ពស់ និងរស់នៅភូមិថ្កុល ឃុំត្រើយស្លា ស្រុកស្អាង ខេត្តកណ្ដាល។

នៅវ័យកុមារ ស្រូយ បានឈប់រៀន និងជួយធ្វើស្រែចម្ការឪពុកម្ដាយ ដោយសារតែជីវភាពគ្រួសារខ្វះខាត។ នៅទសវត្សរ៍ឆ្នាំ១៩៦០ ស្រូយ បានរៀបការ និងប្រកបរបរធ្វើស្រែចម្ការ។

នៅឆ្នាំ១៩៧០ បន្ទាប់ពីមានរដ្ឋប្រហារនៅទីក្រុងភ្នំពេញ ស្រូយ និងគ្រួសារបានចាកចេញពីឃុំរកាខ្ពស់ មករស់នៅភូមិថ្កុល។ នៅភូមិថ្កុល មានការទម្លាក់គ្រាប់បែក ដែលបណ្ដាលឲ្យប្រជាជនភិតភ័យ និងរត់ចូលលេណដ្ឋានគេចខ្លួន។​

នៅឆ្នាំ១៩៧៥ ខ្មែរក្រហមបានជម្លៀសគ្រួសារស្រូយទៅរស់នៅសហករណ៍មួយ នៅតំបន់ផ្សេង ដែលស្រូយមិនចាំឈ្មោះ។ នៅសហករណ៍នោះ ប្រជាជនទាំងអស់ ត្រូវហូបរួមនៅរោងបាយ និងធ្វើការរួមនៅការដ្ឋាន។ ប្រជាជនទាំងអស់ ត្រូវធ្វើការហួសកម្លាំង និងហូបចុកមិនគ្រប់គ្រាន់ បណ្ដាលឲ្យមានជំងឺ និងបាត់បង់ជីវិត។ ស្រូយ និយាយថា នៅពេលប្រជាជនមានជំងឺ គឺមានពេទ្យសហករណ៍ផ្ដល់ថ្នាំរាងដូចអាចម៍ទន្សាយសម្រាប់ព្យាបាល។

ស្រូយ ចងចាំថា នៅរបបខ្មែរក្រហម យោធាខ្មែរក្រហមបាននាំមនុស្សយកទៅកសាង ដោយដឹកតាមកាណូត និងមិនឃើញត្រលប់មកវិញ។ នៅឆ្នាំ១៩៧៩ បន្ទាប់ពីរបបខ្មែរក្រហមដួលរលំ ស្រូយ បន្តរស់នៅភូមិថ្កុលរហូតមកដល់បច្ចុប្បន្ន។ ស្រូយ មិនចង់ឲ្យកើតមានរបបខ្មែរក្រហមសាជាថ្មីនោះទេ៕

សម្ភាសដោយ ឌី ស៊ូម៉េង ថ្ងៃទី៧ ខែសីហា ឆ្នាំ២០២១

អត្ថបទដោយ ស្រ៊ាង លីហ៊ួរ ថ្ងៃទី២ ខែមិថុនា ឆ្នាំ២០២៥