ឈ្មោះ ថេង ថាវីន អាយុ៥៤ឆ្នាំ មានស្រុកកំណើតនៅភូមិបានយ ឃុំអង្កាញ់ ស្រុកព្រៃកប្បាស ខេត្តតាកែវ។ នៅក្នុងសម័យ លន់ នល់ គ្រួសាររបស់ វីន រស់នៅទីក្រុងភ្នំពេញ ហើយឪពុករបស់គាត់ធ្វើជានាយទាហានជើងទឹក កាន់ម៉ារីន របស់ លន់ នល់។ វីន មានបងប្អូនចំនួន៦នាក់ ក្នុងនោះគាត់គឺជាកូនទី៤នៅក្នុងគ្រួសារ។ ក្នុងចំណោមបងប្អូន៦នាក់ មានប្អូនពៅម្នាក់ស្លាប់នៅក្នុងរបបខ្មែរក្រហម ដោយសារអត់អាហារ និងឈឺគ្មានថ្នាំព្យាបាល ហើយប្អូនម្នាក់ទៀត ស្លាប់នៅភ្នំស្រួច ពេលទៅធ្វើជាទាហានរដ្ឋកម្ពុជា។

នៅថ្ងៃទី១៧ ខែមេសា ឆ្នាំ១៩៧៥ យោធាខ្មែរក្រហមបានចូលគ្រប់គ្រងទីក្រុងភ្នំពេញ និងជម្លៀសប្រជាជនចេញពីផ្ទះ ក្នុងនោះគ្រួសាររបស់វីន ត្រូវបានជម្លៀសទៅអាងកំពីងពួយ និងភ្នំខ្លែង ខេត្តបាត់ដំបង។ នៅខេត្តបាត់ដំបង  គ្រួសាររបស់ វីន រស់នៅបែកគ្នា ដោយប្អូនពៅអាយុប្រមាណ២ឆ្នាំត្រូវចូលក្នុងមណ្ឌល, វីន និងបងប្អូនផ្សេងទៀតធ្វើការងារក្នុងកងកុមារ និងកងចល័ត ហើយឪពុកម្ដាយធ្វើការងារនៅក្នុងកងចល័តផ្សេងទៀត។

នៅក្នុងកងកុមារ វីន ធ្វើការងារកាប់ដើមទន្ទ្រានខែត្រយកមកធ្វើជី និងដើររើសកួរស្រូវនៅរដូវប្រមូលផល។ ចំណែកម្ដាយរបស់ វីន ត្រូវធ្វើការងារ ស្ទូង ដក និងកាប់ព្រៃនៅក្បែរសហករណ៍។ វីន និងគ្រួសារត្រូវធ្វើការងាររាល់ថ្ងៃ ប៉ុន្តែរបបអាហារដែលគាត់ទទួលបានគឺបបររាវៗ ដែលមិនគ្រប់គ្រាន់សម្រាប់ហូបចុកនោះទេ។ នៅពេលឃ្លានខ្លាំង វីន បានគាស់គល់ចេក យកមកស្ងោរហូប ឬក៏ទៅកាប់ដើមល្ហុងយកមកកោស រួចដាក់ចំហុយបន្ថែមទៀត ដើម្បីចម្អែតក្រពះ។ វីន បានឲ្យដឹងថា អាហារដែលគាត់ហូបមិនមានរសជាតិនោះទេ ព្រោះមិនមានសូម្បីតែអំបិលហូបជាមួយ ប៉ុន្តែគាត់ត្រូវតែហូប ដើម្បីកាត់បន្ថយការឃ្លាន។

ក្រោយមក អង្គការបានស៊ើបដឹងថាឪពុករបស់វីន ធ្លាប់ធ្វើជាទាហាន លន់ នល់ និងបានយកគាត់ទៅសម្លាប់។ បន្ទាប់ពីសម្លាប់ឪពុករបស់វីនរួច កងសន្តិសុខមានបំណងយកម្តាយ និងបងប្អូនរបស់វីន ទៅសម្លាប់បន្តទៀត ប៉ុន្តែដោយសារ ខាងសហករណ៍ជម្លៀសគ្រួសារគាត់ចេញទៅមុន ទើបរួចខ្លួន។

វីន មិនបានដឹងថាមានតុលាការកាត់ទោសមេដឹកនាំខ្មែរក្រហមនោះទេ ប៉ុន្តែប្រសិនបើមានការកាត់ទោសគឺគាត់ពេញចិត្ត ព្រោះខ្មែរក្រហមបានធ្វើបាបប្រជាជន, បំបិទសិទ្ធសេរីភាព និងសម្លាប់ប្រជាជន។ មួយវិញទៀត វីន ចង់ឲ្យមានការថែរក្សាឯកសារខ្មែរក្រហម ដើម្បីឲ្យកុមារជំនាន់ក្រោយបានដឹង។ នៅពេលដែលអ្នកស្ម័គ្រចិត្តសម្ភាស វីន មានជំងឺហឺត។ ជំងឺរបស់វីន កើតឡើងតាំងពីជំនាន់ខ្មែរក្រហម ប៉ុន្តែមិនទទួលបានការព្យាបាលនោះទេ។ ក្រោយមក វីន បានទៅទទួលថ្នាំគ្រាប់ ពីពេទ្យទាហានជិតវត្តភ្នំ ទើបបានធូរស្រាល។

អត្ថបទដោយ៖ ភា រស្មី

សម្ភាសដោយ៖ គ្រី ភាព ថ្ងៃទី១៩ ខែសីហា ២០២១