(ខេត្តព្រៃវែង) យូង យួន អាយុ៦០ឆ្នាំ មានស្រុកកំណើត និងបច្ចុប្បន្នរស់នៅ ភូមិឆ្អឹងពស់ ឃុំពានរោង ស្រុកស្វាយអន្ទរ ខេត្តព្រៃវែង។ យួន មានបងប្អូនចំនួនប្រាំនាក់ (ស្លាប់ក្នុងរបបខ្មែរក្រហមម្នាក់)។ នៅវ័យកុមារ យួន រៀនបានត្រឹមថ្នាក់ទី១១ (សង្គមចាស់)។ ការរៀនសូត្ររបស់គាត់នៅពេលនោះ​មិនបានទៀងទាត់នោះទេ ព្រោះក្នុងភូមិឃុំកើតមានសង្គ្រាមរវាងក្រុមយោធាខ្មែរក្រហម និងទាហាន លន់ នល់ ហើយនៅឆ្នាំ១៩៧៣ ក៏មានការទម្លាក់គ្រាប់បែកជាញឹកញាប់ធ្វើឲ្យសាលារៀនបិទទ្វារ។

នៅឆ្នាំ១៩៧៥ ពេលខ្មែរក្រហមបានឡើងកាន់អំណាចនៅទូទាំងប្រទេស យួន មានអាយុប្រហែល៩ឆ្នាំ មិនបានបន្តការសិក្សានោះទេ​។ នៅពេលនោះ យួន ត្រូវបានកងឈ្លបខ្មែរក្រហមចាត់ឲ្យរស់នៅក្នុងកងកុមារ ហើយការងាររបស់យួន គឺឃ្វៀលគោក្របី និងរើសកួរស្រូវដែលជ្រុះពីការច្រូតកាត់របស់កងចល័ត។ ដោយសារតែប្រធានកងកុមារ មានចិត្តល្អ គាត់មិនបានធ្វើបាបយួន និងកុមារដទៃទេ។ ។ យួន នៅចាំបានថាខ្មែរក្រហមបានប្រមូលទ្រព្យសម្បត្តិឯកជនទាំងអស់របស់ប្រជាជន ទុកក្នុងសហករណ៍ និងបានបង្ខំឲ្យប្រជាជនរស់នៅ, ធ្វើការ និងហូបរួមក្នុងសហករណ៍។ យួន និយាយថា ពេលខ្មែរក្រហមគ្រប់គ្រងប្រទេសដំបូង របបអាហារមិនមានការខ្វះខាតទេ ប៉ុន្តែម្នាក់ៗត្រូវធ្វើការងារច្រើនក្នុងមួយថ្ងៃ។ រហូតដល់ឆ្នាំ១៩៧៦ របបអង្ករចាប់ផ្តើមខ្វះខាត ប្រជាជន និងកុមារៗទាំងអស់ត្រូវផ្លាស់ប្តូររបបអាហារពីបាយមកបបរវិញ ដោយអ្នកគ្រប់គ្រងប្រាប់ថាប្រទេសកំពុងមានសង្គ្រាម ហើយអង្ករត្រូវយកទៅផ្គត់ផ្គងទ័ពនៅសមរភូមិ។ អំឡុងពេលទៅធ្វើការ យួន ធ្លាប់ឃើញកងឈ្លបខ្មែរក្រហមសម្លាប់មនុស្សដោយវាយនឹងគល់ឫស្សី នៅទួលសម្លាប់មនុស្សក្បែរភូមិ។

ក្រោយរបបខ្មែរក្រហមដួលរលំ នៅទួលនោះ បានបន្សល់នូវឆ្អឹង និងលលាដ៍ក្បាលជនរងគ្រោះជាច្រើន។ ចំណែកក្នុងបរិវេណវត្តត្រូវបានខ្មែរក្រហមប្រើប្រាស់ជាឃ្លាំង​ស្តុកស្រូវ-អង្ករ កន្លែងចិញ្ចឹមសត្វ និងកន្លែងហូបអាហាររួមជាដើម។ រឿងរ៉ាវដែល យួន ចងចាំមិនអាចបំភ្លេចបានក្នុងរបបខ្មែរក្រហមគឺ ក្នុងវ័យកុមារត្រូវទៅធ្វើការឆ្ងាយពីឪពុកម្តាយ និងធ្វើការគ្មានពេលសម្រាក​។ បន្ទាប់ពីរបបខ្មែរក្រហមដួលរលំ យួន បានមករស់នៅជួបជុំបងប្អូន និងឪពុកម្តាយវិញ ប៉ុន្តែបងរបស់គាត់ម្នាក់បានស្លាប់ដោយមិនដឹងមូលហេតុ។

បច្ចុប្បន្ន យួន ប្រកបមុខរបរជាកសិករ និងចិញ្ចឹមសត្វពាហនៈ។ ចំណែកបញ្ហាសុខភាពវិញ គាត់មានជំងឺឈឺសន្លាក់ដៃ និងសន្លាក់ជើងពិបាកក្នុងការធ្វើដំណើរ​៕

សម្ភាសន៍ដោយ តឿ ទី ថ្ងៃទី២៤ ខែមករា ឆ្នាំ២០២៤

អត្ថបទដោយ អេង សុខម៉េង